Shqipëria parashikohet të përfundojë në vitin 2030 dixhitalizimin e plotë të dosjeve të pronave, duke përfshirë edhe pronat të paregjistruara më parë.
Në dokumentin “Udhërrëfyesi për Shtetin e së Drejtës-Kapitulli 23 “Gjyqësori dhe të drejtat themelore” ku paraqiten masat kryesore që parashikohen të merren në kuadër të procesit të adresimit të gjetjeve të paraqitura nga Komisioni Evropian për procesin e negociatave për anëtarësimin e vendit në BE të publikuar te konsultimet publike, për zbatimin e së drejtës së pronës me qëllim uljen e korrupsionit parashikohet ngritja e sistemit të integruar të menaxhimit të tokës.
Ngritja e sistemit të integruar pritet të përfundojë në mënyrë progresive më 2030.
Fillimisht brenda vitit 2024 pritet të mbyllet projekti i nisur në 2022 për dixhitalizimin e dosjeve të regjistruara. Regjistrimi për herë të pronave të paregjistruara pritet të mbyllet në 2028. Dy vjet më pas në 2030 pritet të mbyllet dixhitalizimi i plotë i dosjeve në Shqipëri.
“Plani i integruar do të përfshijë përfundimin e dixhitalizimit të dhënave ligjore deri në vitin 2024. Përfundimin e dixhitalizimit të hartës deri në vitin 2026. Finalizimin e regjistrimit të parë të pronës së paregjistruar deri në vitin 2028. Dixhitalizimin e plotë të procesit të regjistrimit të pronës deri në vitin 2030”, citohet në dokument.
Sakaq për të përmbushur kërkesat e planit të menaxhimit të integruar të tokës do të rishikohen vazhdimisht deri në 2025 sipas raportit burimet njerëzore dhe financiare të ASHK. Burimet e duhura njerëzore dhe financiare për funksionimin e duhur të Agjencisë Shtetërore të Kadastrës do të rishikohen vazhdimisht nga viti 2025 e në vazhdim Agjencia Shtetërore e Kadastrës zbaton Planin e Veprimit Kundër Korrupsionit për Agjencinë duke përfshirë masa për transparencë dhe efikasitet dhe monitoron dhe vlerëson zbatimin e tij rregullisht nga viti 2025 e në vazhdim.
Sistemi i integruar i menaxhimit të tokës është krijuar në mënyrë progresive dhe përfundon deri në vitin 2030. Rreziku i shfaqjes së korrupsionit në Agjencinë e Kadastrës ulet ndjeshëm deri në vitin 2030, duke siguruar zbatimin dhe monitorimin e duhur të Planit të Veprimit kundër Korrupsionit.
Projekti i dixhitalizimit të arkivës së pasurive të paluajtshme nisi të zbatohet në fillim të 2022.
Projekti që do të zgjaste 2 vjet (nga janar 2022 deri në dhjetor 2023) do të dixhitalizojë 4,7 milionë pasuri të paluajtshme në të gjithë vendin. Nga 4,7 milionë pasuri të paluajtshme në kadastër vetëm 2,8 milionë prej tyre kanë referenca. Nga 2,8 milionë referenca vetëm 700,000 pasuri kanë dosjen e plotë të regjistruara pas vitit 2014, ndërsa për pasuritë e tjera ishte bërë vetëm skanimi i dosjeve.
Sakaq nga 3 Korriku 2023 ASHK ka ndryshuar sistemin për shqyrtimin e aplikimeve të individëve dhe bizneseve për ofrimin e shërbimeve në kadastrën e pronave. Shërbimi në kadastër prej fillimit të muajit korrik ofrohet vetëm nëpërmjet aplikimeve online nga zyrat noteriale dhe e-Albania. Më përpara qytetarët dhe bizneset mund të paraqiteshin në zyrat e hipotekës dhe aplikimet mund t’i kryenin nëpërmjet sporteleve pritëse për aplikimet nga Agjencisë së Ofrimit të Shërbimeve Publike të Integruara (ADISA). Ndryshimi i sistemit të aplikimeve për gati 3 muaj rresht krijoi vonesa në shqyrtim si për aplikimet që kryheshin nëpërmjet zyrave noteriale, ashtu edhe nga individët.
Më të prekur nga kjo situatë ishte tregu i pasurive të paluajtshme, ku shumë agjenci real estate ngritën shqetësimin se u përballën me shtyrje të përfundimit të transaksioneve.
/MONITOR/
