Gjykata e Posacme Kundër Korrupsionit dhe Krimit të Organizuar ka lënë në fuqi masat për 14 personat e hetuar nga SPAK në lidhje me koncensionin për inceneratorin e Tiranës. Masa e sigurisë është ndryshuar vetëm për Jetmir Llapajn, anëtar i Qendrës Kombëtare të Biznesit, i cili nga “arrest në burg” është lënë në “arrest shtëpie”.
GJKKO ka lënë në burg 5 të arrestuar si Taulant Tusha, Namir Simirxhiu, Bledar Karoli, Lefter Koka dhe Alqi Bllako ndërsa në ‘arrest shtëpie’ janë 7 të tjerë, konkretisht Etleva Kondi, Valbona Ballgjini, Alba Thoma, Sidita Kopliku, Silena Toma, Pëllumb Abeshi dhe Jetmir Llapaj. Ndërkaq, të akuzuarit Erjon Murataj dhe biznesmenët, pronarë të koncesionarit “Integrated Energy B.V SPV” Klodian Zoto e Mirel Mërtiri, janë në kërkim.
Të gjithë të pandehurit kanë mohuar akuzat e ngritura nga SPAK. Shumica prej tyre kanë folur vetë në seancë duke pretenduar se kanë kryer vetëm detyrën dhe kanë zbatuar ligjin. Ndërkohë gjatë fjalës së tij ish-ministri i Mjedisit Lefter Koka ka deklaruar se akuzat e ngritura për të dhe stafin janë ngritur në bazë të opinionit politik dhe mediatik.
Kërkoj ndjesë gjithë stafit nëse janë këtu për shkakun tim. Ata kanë bërë më të mirën që mund të bënin. Akuzat janë ngritur mbi bazë të opinionit politik e mediatik. Jam viktimë e Saliut dhe e partiçkës së vogël. Ndjesë të gjithë juve (personave që janë akuzuar në dosjet ku ai është pjesë)”- është shprehur ai.
Sakaq ish-sekretari i Përgjithshëm i Ministrisë së Mjedisit Alqi Bllako, në mbrojtjen e tij ka pretenduar se për blerjen e makinerisë së birrës me vlerë 119.755 disponon fatura.
“E kam blerë personalisht në Çeki. Disponoj fatura që mund t’jua vë në dispozicion. Nuk kam përfituar blerje të tillë nga Klodian Zoto”, tha Bllako.
Për punësimin e Vladimir Bezhanit,Alqi Bllako tha:
“Është një kontratë e ligjshme me sektorin privat. As me rregullore as me ligj nuk ndalohet. Është një nga tre ekspertët më të mirë në republikë sa i përket studimeve për trajtimin e mbetjeve. Paga e personit të punësuar është e ligjshme, sa kohë është e ligjshme s’ka motiv për të ngritur akuzë”.
Sa i takon komunikimeve, edhe në email, të disa prej zyrtarëve me Klodian Zoton apo punonjës të kompanisë së tij, të akuzuarit kanë pretenduar se në rastin e ofertave të pakërkuara duhet të ketë komunikim, bisedime e kontakte mes firmës që ka shfaqur interes dhe kontraktorëve.
Hetimet për inceneratorin e Tiranës
SPAK hetoi kontratën e koncesionit të 31 gushtit të vitit 2017 e lidhur midis Ministrisë së Mjedisit, që në atë kohë drejtohej nga Lefter Koka, dhe shoqërisë “Integrated Energy B.V SPV”, në përbërje të së cilës është aksionere edhe shoqëria Integrated Technology Services” në pronësi të Klodian Zotos, por që sipas SPAK pas koncesionarit qëndrojnë të njëjtë persona Zoto e Mërtiri.
SPAK ka zbuluar se Klodian Zoto dhe Mirel Mërtiri përdorën persona dhe shoqëri të tjera për të fshehur gjurmët si pronarët e vërtetë. Zoto dhe Mërtiri, përfituan përmes faturave tatimore të falsifikuara, 409 milionë lekë thotë SPAK, dhe akuzon 7 anëtarët e komisionit të dhënies se Koncesionit se i kanë favorizuar, bashkë me Lefter Kokën e Alqi Bllakon, që ndodhen në qeli për Inceneratorët e Fierit dhe të Elbasanit.
Sipas Prokurorisë së Posaçme, 7 anëtarë të komisionit të dhënies së koncensionit Valbona Ballgjini, Pëllumb Abeshi, Erjon Murataj, Sidita Temali, Etleva Kondi, Taulant Tusha, Namik Simixhiu, kanë propozuar dhënien e bonusit prej 8% të pikëve totale të garës shoqërisë së Zotos e Mërtirit “pa hartuar një raport përmbledhës dhe pa u sqaruar ende kostot e projektit”.
Më tej thotë SPAK, Lefter Koka si ministër i Mjedisit, Alqi Bllako si sekretar i përgjithshëm në Ministri, drejtoresha juridike Alba Thoma dhe përgjegjësi i prokurimeve në ministri Bledar Karolin “kanë përgatitur dhe dërguar më pas projektvendimin në Këshillin e Ministrave”.
Shoqëria e Zotos dhe Mërtirit, thotë SPAK ka qenë në dijeni të rrethanave konkurruese që përpara se të shpallej procedura e dhënies së koncesionit. SPAK thotë se të njëjtët zyrtarë nga ministri Koka deri te 7 anëtarët e komisionit të koncesionit, kanë pajisur shoqërinë me dokumentacionin e nevojshëm që duhej të dorëzonte në Ministrinë e Mjedisit para dhe gjatë procedurës koncesionare, “me qëllim shpalljen fitues të kësaj shoqërie”
SPAK thotë se dokumentet standarde të koncensionit nuk janë hartuar nga anëtarët e komisionit, por nga vetë punonjës të shoqërisë së Klodian Zotos të cilat më tej janë hedhur në sistemin e prokurimit publik sikur t’i kishin hartuar vetë. SPAK i akuzon anëtarët e komisionit të dhënies së koncensionit se i kanë përllogaritur kostot nga studimi i fizibilitetit të shoqërisë “Integrated Energy BV”, pa kryer asnjë verifikim në lidhje me vërtetësinë e tyre.
Është caktuar masa e sigurisë ‘arrest me burg’ për:
1- Lefter Koka, ish-ministër i Mjedisit,- ‘Arrest me burg’- Akuzohet për ‘Shpërdorim detyre’ Masa iu komunikua në burg
2- Alqi Bllako, ish sekretari i Përgjithshëm në Ministrinë e Mjedisit, – Akuzohet për ‘Korrupsioni pasiv i funksionarëve të lartë të shtetërorë ose i të zgjedhurve vendorë’
Masa iu komunikua në burg
3- Mirel Mërtiri, pronari i Albteckenergy – Në kërkim – Akuzohet për ‘Mashtrim’ e ‘Pastrimi i produkteve të veprës penale apo i veprimtarisë kriminale’
4- Klodian Zoto, administrator i kompanisë koncensionare, – Në kërkim – Akuzohet për ‘Mashtrim’
5- Erjon Murataj, anëtar i Komisioni Prokurimit për Inceneratorin e Tiranës,- Në kërkim – Akuzohet për ‘Shpërdorim detyre’
6- Bledar Karoli, ish-zyrtar i Ministrisë së Energjisë, arrestuar- Akuzohet për ‘Shpërdorim detyre’
7- Taulant Tusha drejtor i Infrastrukturës në Bashkinë e Tiranës, i vetëdorëzuar- Akuzohet për ‘Shpërdorim detyre’
8- Namik Simixhiu, Ish anëtar i Komisioni Prokurimit Inceneratorit të Tiranës, arrestuar- Akuzohet për ‘Shpërdorim detyre’
Iu është komunikuar masa ‘Arrest shtëpie’:
9- Jetmir Llapaj punonjësit e Qendrës Kombëtare të Biznesit, arrestuar- Akuzohet për ‘Shpërdorim detyre’
10- Pëllumb Abeshi, ish-zyrtari i ministrisë së Mjedisit, i komunikohet masa ‘arrest shtëpie’,- Akuzohet për ‘Shpërdorim detyre’
11- Alba Thoma, ish-Drejtoresha Juridike e Ministrisë së Mjedisit, – Akuzohet për ‘Shpërdorim detyre’
12- Valbona Ballgjini, anëtare e Komisionit të dhënies së koncesionit,- Akuzohet për ‘Shpërdorim detyre’
13- Sidita Temali, anëtare e komisionit të dhënies së koncesionit, – Akuzohet për ‘Shpërdorim detyre’
14- Etleva Kondi, anëtare e komisionit të dhënies së koncesionit, – Akuzohet për ‘Shpërdorim detyre’
15- Silena Tola, punonjëse e Qendrës Kombëtare të Biznesit,- Akuzohet për ‘Shpërdorim detyre’.