Kryeministri Edi Rama nuk pranoi se i ka propozuar Vangjel Tavos që të marrë drejtimin e Himarës. I pyetur për lajmet që kanë qarkulluar në mediet greke Rama tha se nuk kanë asnjë burim të sigurtë duke theksuar se qeveria është duke pritur vendimin e formës së prerë të drejtësisë që më pas të marrin veprime për të zgjidhur ngërçin e krijuar në këtë bashki pasi kryebashkiaku i zgjedhur Fredi Beleri ndodhet në burg.
Pyetje: Çështja Beleri, ka pasur hipoteza se për kryesimin e bashkisë Himarë keni propozuar Vangjel Tavon. A është e vërtetë?
Rama: Vendimi i GJKKO ishte pozitiv në këndvështrimin tim edhe për një hapësirë që krijon por së pari njëherë nuk është vendim i formës së prerë dhe do të presim të marrë formë të prerë, s’mund të veprojmë me një vendim të shkallës së parë. Të gjitha këto të tjerat që kanë qarkulluar kanë si burim median greke as median shqiptare as qeverinë as zyrën time. Kështuqë unë nuk komentoj çfarë më vë mua në gojë apo në kurriz media greke pa më pyetur dhe mua. Janë emra historira që unë i kam parë në median shqiptare të marra nga media greke. Është pyetje për kolegët tuaj grekë në gazeta portale televizioni ose kur tu jepet pyetja pyesni autoritetet greke. Unë di që ne presim vendimin e formës së prerë.