Pas vizitës së tij në Tiranë dhe takimit që ka bërë në burgun e Durrësit me Fredi Belerin, ministri grek i Mbrojtjes së Qytetarit, z. Yiannis Oikonomou ka theksuar edhe njëherë rëndësinë që ka për Greqinë kjo çështje.
Ai kërkoi që kryetari i zgjedhur i Himarës duhet të betohet sa më parë teksa tha se nuk po merren parasysh parimet e shtetit ligjor, prezumimi i pafajësisë dhe respektimi i të drejtave politike.
“U takova sot në burgjet e Durrësit, në prani të ambasadores tonë në Shqipëri, znj. Konstantinas Kamitsi, me kryetarin e zgjedhur të Bashkisë së Himarës , anëtar i minoritetit etnik grek të Shqipërisë, z. Fredis Beleris, i cili qëndron në paraburgim për më shumë se katër muaj.
Për Greqinë ky rast ka qenë që në fillim dhe mbetet tejet serioz. Respektimi i shtetit të së drejtës dhe i të drejtave politike janë parimet dhe vlerat kryesore evropiane.
Qëndrimi i Greqisë është se në rastin e zotit Beleris nuk merren parasysh parimet e shtetit ligjor, prezumimi i pafajësisë dhe respektimi i të drejtave politike. Pala shqiptare duhet të lejojë menjëherë betimin e zotit Beleris si kryetar bashkie, duke respektuar verdiktin e qytetarëve në zgjedhjet e fundit.
Zgjatja e situatës aktuale hedh një hije serioze mbi marrëdhëniet tona dypalëshe dhe është në kundërshtim me të drejtën ligjore evropiane, me gjithçka që ajo përfshin.”
Vizita në burgun e Durrësit vjen një ditë pasi Gjykata e Posaçme vendosi nisjen e gjykimit në ngarkim të Fredi Belerit, i cili u arrestua para zgjedhjeve të 14 majit për blerje votash. Ministri grek Ikonomu ka shfrytëzuar pjesëmarrjen në Samitin e Ministrave të Brendshëm të vendeve të nismës së Berlinit, që u mbajt në Tiranë, për të takuar Fredi Belerin, kryetarin e zgjedhur, por të pabetuar të bashkisë së Himarës.
Mbrojtja e tij ka deklaruar se Beleri po mbahet në burg për arsye politike, ndërsa ka depozituar në të dyja shkallët e gjykatës së Posaçme kërkesa për zbutjen e masës së sigurisë, në mënyrë që të lihet i lirë dhe të betohet e ushtrojë detyrën e kryebashkiakut të Himarës.